काठमाडौं । काठमाडौं उपत्यकाका स्थानीय तहहरूले विद्यालयमा भौतिक उपस्थिति गराएर कक्षा सञ्चालनको तयारी गरेका छन्। शिक्षा मन्त्रालयले कोभिड—१९ संक्रमणका कारण बन्द विद्यालय स्थानीय तहले निर्णय गरी सञ्चालन गर्न दिने भएपछि विद्यालय खोल्ने तयारीमा सरोकारवालाहरु लागेका हुन् ।
महानगरभित्र सामुदायिक विद्यालयमा पढ्ने १६ हजार विद्यार्थी छन्। विद्यालय खुल्दा सबै विद्यार्थीको सुरक्षाको चुनौती देखिएको छ। आर्थिक रूपमा कमजोर विद्यार्थीलाई महानगरपालिकाकै कोषबाट सुरक्षा सामग्री उपलब्ध गराउने तयारी रहेको प्रवक्ता महर्जनले बताउनुभयो । काठमाडौं महानगरपालिकाले सरोकारवालासँग छलफल गरिरहेको मेयर विद्यासुन्दर शाक्यले बताउनुभयो । महानगरपालिकामा अहिले ६ सय ४१ वटा संस्थागत र ९१ वटा सामुदायिक विद्यालय छन्।
भक्तपुर नगरपालिकाले पनि विद्यालय खोल्ने तयारी गरेको छ। भक्तपुरमा ३५ सामुदायिक र ५७ वटा संस्थागत विद्यालय छन्। ठूलो कक्षाबाट आलोपालो गर्दै विद्यार्थीलाई भौतिक रूपमै उपस्थिति गराएर विद्यालय खोलिने मेयर सुनील प्रजापतिले बताउनुभयो ।(खुल्लानेपाल.कमबाट साभार)
