आईआरजीसीले ती आक्रमणलाई केवल “प्रारम्भिक चेतावनी” भन्दै इजरायलले
सैन्य कारबाही जारी राखे थप कडा प्रतिक्रिया दिइने चेतावनी दिएको छ।

एजेन्सी, जेष्ठ २५, काठमाडौं— इरान र इजरायलबीचको तनाव थप चर्किएको छ । इरानले इजरायलतर्फ क्षेप्यास्त्र प्रहार गरेपछि आफ्नो पश्चिमी क्षेत्रको हवाई क्षेत्र बन्द गरेको छ भने क्षेत्रीय सुरक्षालाई मध्यनजर गर्दै इराक र सिरियाले पनि हवाई उडानमा प्रतिबन्ध लगाएका छन् ।

Advertisement 1

इरानी सरकारी समाचार एजेन्सी इर्नाका अनुसार राष्ट्रिय नागरिक उड्डयन संगठनका प्रवक्ता मजिद अखभानले सुरक्षा अवस्थाको मूल्यांकनपछि अर्को सूचना जारी नभएसम्म पश्चिमी हवाई क्षेत्र बन्द गरिएको जानकारी दिएका छन् ।

इरानको इस्लामिक रिभोलुसनरी गार्ड कर्प्स (आईआरजीसी) ले लेबनानको राजधानी बेरुत माथि इजरायलले गरेको आक्रमणको जवाफस्वरूप हालैका क्षेप्यास्त्र प्रहार गरिएको जनाएको छ ।

आईआरजीसीले ती आक्रमणलाई केवल “प्रारम्भिक चेतावनी” भन्दै इजरायलले सैन्य कारबाही जारी राखे थप कडा प्रतिक्रिया दिइने चेतावनी दिएको छ।

आईआरजीसीले जारी गरेको विज्ञप्तिमा इजरायलले आक्रमण नरोके क्षेत्रभर रहेका अमेरिकी र इजरायली सैन्य तथा रणनीतिक संरचनाहरू समेत निशानामा पर्न सक्ने उल्लेख गरिएको छ ।

यसैबीच, इरानको खातम अल–अम्बिया सेन्ट्रल कमान्डका प्रमुख जनरल अली अब्दोल्लाहीले दक्षिणी लेबनान र बेरुतका उपनगरमाथि भइरहेको इजरायली आक्रमण तत्काल रोक्न आग्रह गरेका छन् । उनले इजरायलले आफ्नो सैन्य अभियान विस्तार गरे अझ विनाशकारी प्रतिआक्रमणको सामना गर्नुपर्ने चेतावनी दिए ।

उता, इजरायली सेनाले इरानबाट प्रहार गरिएका दुई चरणका क्षेप्यास्त्र आक्रमणहरू सफलतापूर्वक निष्क्रिय बनाइएको दाबी गरेको छ ।

सामाजिक सञ्जाल एक्समार्फत जारी विज्ञप्तिमा इजरायली सेनाले हालसम्म प्रहार गरिएका सबै क्षेप्यास्त्रहरूलाई हवाई प्रतिरक्षा प्रणालीमार्फत बीचमै रोकेको जनाएको छ ।

सेनाले थप आक्रमणको जोखिम अझै कायम रहेको भन्दै हवाई रक्षा प्रणाली उच्च सतर्कतामा राखिएको जानकारी दिएको छ ।

तनाव थप बढ्न सक्ने चिन्ताबीच अमेरिकी राष्ट्रपति डोनाल्ड ट्रम्पले दुवै पक्षलाई संयमता अपनाउन आग्रह गरेका छन् ।

अनलाइन सञ्चारमाध्यम एक्सियोससँगको संक्षिप्त कुराकानीमा ट्रम्पले इजरायली प्रधानमन्त्री बेन्जामिन नेतान्याहूको सँग सम्पर्क गरेर थप जवाफी आक्रमण नगर्न आग्रह गर्ने बताए ।